الرئيس السيسى يفتتح عددا من المشروعات بالإسكندرية.. ويؤكد: الدولة حرصت على عدم انعكاس زيادة الأسعار على المواطن.. 700 مليون جنيه تعويضات إخلاء محور المحمودية.. وشبكة الطرق تناسب 100 مليون

- الرئيس السيسى: الدولة تدخلت لمنع زيادة أسعار الكهرباء والغاز والسماد

- الرئيس السيسى: الدولة تعمل بكافة القطاعات ومعلومات المشروعات متاحة للجميع

- الرئيس السيسى: بنحط كل المصريين فى الصورة معانا عشان يعرفوا الإمكانيات الموجودة

- الرئيس السيسى: المخالفات تعطل تطوير وبناء المحاور ودى فلوس مصر والناس

أكد الرئيس عبد الفتاح السيسى، أن الدولة كانت حريصة على عدم انعكاس زيادة أسعار الذرة والقمح على المواطنين، مضيفا: "إحنا كدولة حرصنا على عدم زيادة التكلفة الكبيرة لما الدكتورة هالة اتكلمت عن زيادة أسعار الذرة والقمح وإحنا بنستورد كميات ضخمة، لكن إحنا لم نعكس الزيادة اللى حصلت فى الأسعار خالص".

وأضاف الرئيس عبد الفتاح السيسى خلال افتتاح محور المشير فؤاد أبو ذكرى بالإسكندرية: "الأسعار غالية برة.. الهدف من تقديم عرض الدكتورة هالة السعيد إن إحنا كدولة نقول للناس الحكاية إيه؟ بشكل شايفينه إزاى؟.. واحنا كدولة عملنا إيه؟".

وتابع الرئيس: "ممكن حد يقولى مش كفاية، كنتوا زودتوا شوية الحد الأدني.. موافق.. كان ممكن أوى الرقم ده فى الحد الأدنى نزوده ونيجى على البند 4 "القمح – الذرة" منقربش منه".

وواصل الرئيس: "ما قدرش أفرض على القطاع الخاص فى ظل مشكلة أسعار المستلزمات الإنتاج واضطراب سلاسل الإمداد ومشاكل الطاقة اللى نتج عنه أسعار المنتجات الأوروبية وزادت علشان يعوض التكلفة".

وتحدث الرئيس عبد الفتاح السيسى، عن دور الدولة فى حماية المواطنين من زيادة أسعار الخدمات، متابعا: "لما كنا فى المنصورة وحد كلمنى عن سعر السماد.. لو حطينا التكلفة الحقيقية للسماد والكهرباء.. هيبقى فوق طاقة الناس.. أنا بقول للمصريين كل المصريين.. لو ما جيتش على بند 4 الخاص بأسعار الخدمات مثل الكهرباء وغيرها والدولة حطت أرقام ضخمة فى قطاع الطاقة والكهرباء والغاز".

وأضاف الرئيس السيسى: "لا زودنا بنسبة كبيرة ثمن الغاز الحقيقي.. السعر زاد 170%.. النهاردة لا وزارة الكهرباء بتاخد الغاز بالتمن ده.. ولا مصانع الأسمدة بتاخد الغاز بالسعر ده.. لو بنتكلم عن سعر الكهرباء .. هتكون غالية اوى سواء على المصانع أو المواطنين وده مش حصل".

وقال الرئيس عبد الفتاح السيسى، إن كل عام يشهد دخول نحو مليون فرصة عمل للأسواق، مضيفا: "كل سنة بيدخل سوق العمل مليون.. طيب لو إحنا النهاردة فى 3 سنين عاوز توفر فرص عمل لـ 3 ملايين خلال 3 سنوات بحد أدنى من المرتبات".

وأضاف الرئيس السيسى: "بكلم كل بيت مصرى قولى وانتبه إزاى نوفر 3 مليون فرصة عمل خلال الثلاث وأربع سنين اللى جايين؟..ده زيادة موجودة عن الموجودة فى السوق، والرقم مش بسيط ..ومفيش دول فى العالم كتير تقدر توفر فرص عمل للحجم ده سنويا".

وقال الرئيس عبد الفتاح السيسى، إن الدولة تهتم بالعمل والتنمية والبناء فى كل القطاعات، متابعا: "الدولة مش سايبه قطاع مش بتشتغل فيه.. الفكرة إنك بتمس قطاع بنفسك.. يقولك انتوا مهتمين بالطرق والكباري.. أنت علشان شوفت الطرق والكبارى بنفسك ومشيت عليها.. بس قطاع الزراعة أنت ما شوفتوش".

وأضاف الرئيس السيسى: "فى 250 ألف فدان زيادة فى القمح.. المفروض كانوا 400 ألف.. والسنة الجاية يوصلوا إلى مليون فدان بعيدا عن الرقعة القديمة وبعيدا عن الدلتا.. بنتكلم عن الدلتا الجديدة وتوشكى وشرق العوينات.. معناها أن ازود مليون فدان.. فى زراعة واحدة هدخل من 2.5 إلى 3 ملايين طن حسب القدرة فى الزراعة".

وقال الرئيس عبد الفتاح السيسى، إن الدولة تعمل فى كافة القطاعات، مضيفا: "الدولة شغالة فى القطاعات المختلفة.. لا تغفل قطاع.. اتصالات وتعليم وصحة وزراعة وصناعة.. مفيش قطاع مش شغالين فيه.. من هقول الإعلام مش بيغطى ده ولا غطوا كويس.. هقول للناس بطلوا ترددوا الكلام اللى بيترمى".

وأضاف الرئيس السيسى، خلال كلمته فى افتتاح محور التعمير الجديد بالإسكندرية: "كل المعلومات والبيانات متاحة على موقع مجلس الوزراء والوزارات المختلفة وفق الإنجازات التى تتحقق فيها.. لو دخلت على النقل هتشوف.. وعلى موقع رئاسة الجمهورية.. توقفوا عن أن دولة توفر مليون فرصة عمل زيادة ازاى وبكام.. ده مش بنخوف بعض.. ولما طلبت من الدكتورة هالة السعيد بيخوفنى انا ولما بنجتمع بحضور الدكتور مصطفي.. قولتها ما تخوفوش الناس.. احنا مش بنخاف واحنا معانا ربنا وده أقصى حاجة ممكن نعملها".

وقال الرئيس عبد الفتاح السيسى: "معانا ناس فى مصر حريصة على بلدنا كل إنسان فى مصر مسئول ومش بتكلم عن المسئولين.. انا بتكلم على المصريين".."إحنا بنحطكم فى الصورة يا مصريين علشان تعرفوا إننا بنحاول نخفف بالإمكانيات الموجودة عندنا.. 3 سنين دلوقتى وسنتين كورونا والسنة خلصت خلاص بتاعة الأزمة الروسية وإحنا لازم نكون متأكدين أن ربنا معانا.. ومازح الرئيس السيسى وزيرة التخطيط قائلا: "متخوفنيش تانى يا دكتورة هالة".

وعلق الرئيس على إنشاء شبكة الطرق قائلا:" شبكة الطرق كانت تخدم فى السابق 30 مليون نسمة، معقبا: "مستغربين قوى من التكاليف ..خلينى اقولكم ان شبكة الطرق كانت تخدم 30 مليون وعلشان كده مكنتش تبنى تنمية ولا حركة.. اللى احنا بنعمله نحاول نعمل شبكة تناسب 100 مليون ويمكن 10 سنين كمان".

وأضاف الرئيس: "محور زى النوبارية كان ممكن ميكلفناش لو كان الناس لم تتعدى على جسر المحور.. تخيلوا يا مصريين إن أنا بحمى جسر الترعة بالطريق.. اضطر علشان حماية الجسر اعمله طريق يخدم طريق ونحمى جسر أرض دولة.. ده معناه ان احنا كدولة، المواطنين عندنا من كتر الأمور ما فكت مننا خلال السنين اللى فاتت خلاص بقا ابنى عليه".

وواصل الرئيس: "محور المحمودية لو المحور مكنش عليه اكتر من الف او الفين وحدة على ارض دولة ودفعنا 700 مليون جنيه تعويض اجتماعى ..يعنى رغم انه مخالف ومش ارضه لكن قلنا منقدرش نسيب الناس كده ونمشيها..اللواء هشام قال محتاجين 700 مليون جنيه علشان اخلاء المكان وانشاء طريق بطول 70 كيلو".

كما تحدث الرئيس السيسى، عن تأثير المخالفات على تطوير وبناء المحاور الجديدة، متابعا: "كان زمان محور المحمودية اتعمل بسهولة من سنة ونص فاتوا لو مكنشى فيه مخالفات.. بنتكلم عن تعويض الناس وتدبير الأموال المطلوبة لهم.. وبعدين نزيل المخالفات ونعمل المحور.. وفيه حتت مش قدرنا نعمل فيه.. وفق الكثافة السكانية قولنا نعمل كوبرى على الطريق لمنع الإزالة ونحافظ على الترعة والناس.. الناس تكون منتبه لده .. المفروض مش نعمل كده تانى والدولة مش تسمح بكده بتاني.. مفيش محافظ بالتعدى على جسر ترعة أو حرم طريق خالص".

وأضاف الرئيس السيسى: "حتى موضوع الطريق الزراعى سنة 59.. لو مكنشى على جسر الطريق أو حرم الطريق بناء.. كان ممكن نعمل الطريق 5 حارات و5 حارات فى كل اتجاه بربع التكلفة.. كملنا الطريق الصحراوى للتخفيف على الزراعى.. وطريق النوبارية بالطريقة دي.. علشان نقدر نحرك الناس على الطريق الزراعى والدلتا كويس.. أنا بقول للمسئولين فى المحافظات والمسئولين فى الدولة والمواطنين.. لازم ناخد بالكم.. ده تكاليف كبيرة جدا.. ودى فلوس مصر والناس.. بدل ما اصرف مليار و2 الاقى بصرف 5 و6 مليارات".