خالد بشر يرفض برنامج الحكومة:"الفساد منتشر..ونشيل الحكومة ولو مشينا الشعب يجيبنا تانى"

أكد خالد بشر، عضو مجلس النواب بالزقازيق، فى كلمته خلال الجلسة العامة للبرلمان المنعقدة الآن، أنه يرفض برنامج الحكومة، قائلا: "وأنا جاى علشان أناقش برنامج الحكومة مش عارف أتكلم فى أيه الوقت غير كاف والبرنامج كبير، لكن هتكلم فى نقطة وهى إزاى هنعمل حاجة واحدة فى بلد الفساد يعمها".

وعقب الدكتور على عبد العال، رئيس مجلس النواب على كلام النائب: "الفساد مش يعمها، الفساد موجود لكن لا يعمها"، ليرد النائب خالد بشر: "والله يا دكتور كل واحد يعبر عن رأيه، البلد مليانة فساد، وكان نفسى الحكومة تحط برنامج خلال سنتين يوضح كيفية القضاء على الفساد والبيروقراطية، وأن تحقق اللامركزية، فهذا البرنامج إذا تحقق فى 6 شهور محدش هيحس بيه بدون تحقيق اللامركزية، ورئيس الحكومة والوزراء عايزين كل مقاليد الأمور فى إيديهم، إزاى تدير بلد فيها 90 مليون من مكان واحد، والمحافظات كيف تشعر بما يتحقق وهى لا ترى رئيس الحكومة ووزراءه".

وأضاف: "وزير التموين منزلى تونة عند البقال للناس الغلابة، التونة دى مستوردة بالدولار، الناس عايزة سكر وزيت، الناس مش لاقية تاكل يا معالى وزير التموين، والقرية عايزة صرف صحى مش عايزة إسكان، والمشكلة عندنا عمارات مش مسكونة وقلت لرئيس الوزراء هات وزير الإسكان يلف معايا بالعربية هيشوف 700 عمارة غير مسكونة وشبابيكها مسروقة، دى شفاطة فساد".

وختم بشر كلامه قائلا: "النواب كلهم انتقدوا برنامج الحكومة وفى النهاية هنوافق عليه، إيه المشكلة نمشى الحكومة دى ونجيب حكومة تانية، ولو مشينا نمشى والشعب هيجيبنا تانى، الكلام جميل لكن التنفيذ صعب، قبل ما تبنى شيل الأنقاض الأول، ابنى للشباب وشغلهم، وبناء على ذلك أرفض بيان الحكومة".