كتب مصطفى النجار
انتقدت جليلة عثمان، عضو مجلس النواب، قرار وزارة التموين بزيادة أسعار السكر والزيت والسمن النباتى، قائلة: "الحكومة عايزة تريح نفسها من التموين وتقولك دعم نقدى، "ده ضحك على الدقون، هو انتم عملتم حصر بمستحقين الدعم من الأساس، كده وزير التموين بيهدد الأمن القومى المصرى لتسببه غلاء الأسعار"، ومتوقعة زيادة معدلات الفقر وإطلاق الحرية لحركة الأسعار فى الأسواق، وسنجد سعر كيلو السكر بـ 20 جنيها وزجاجة الزيت وكيلو الأرز كذلك، و"هنرجع نقول زود الدعم تانى".
وأضافت النائبة جليلة عثمان فى تصريحات لـ"برلمانى": "أنا ضد الدعم النقدى، ومع الدعم العينى فى شكل سلع السكر والزيت والأرز، كحصة أساسية شهرية وأدعوا لعدم المساس بكمياتها وأسعارها، وهذا هو الدعم الحقيقى".
واستنكرت بإعلان وزير التموين محمد على الشيخ، بزيادة الدعم لكل بطاقة تموين بواقع 3 جنيهات للفرد فى منتصف شهر ديسمبر الماضى، وبعد أسبوع زاد سعر كيلو السكر من 4 جنيهات إلى 7 جنيهات، كذلك زاد سعر الزيت من 9 إلى 11.5 جنيه، والأرز أيضًا زاد سعره، وتساءلت: "بيزودنى 3 جينه ويرفع الأسعار 10 جنيه".
وقالت: "بتدى المواطن فى البطاقة كيلو سكر وكيلو زيت وكيلو أرز لكل فرد، وحتى لو نقيت البطاقات من غير المستحقين مش هتكون محتاج تزود الدعم أو تزود الأسعار على العكس ممكن وقتها بس تدى السلع للمستحقين ببلاش خالص".
وهاجمت النائبة جليلة عثمان، وزير التموين، قائلة: "أنت بتدى ناس ماتستحقش، كان مفروض قبل الزيادة تنقى البطاقات، لأنك كنت هتجد دعم عالى فائض تقدر تصرفه على الناس، وأنا حاسة إنه اتجاه للحكومة لتنفيذ الدعم النقدى، وأحذر من هذا الدعم النقدى، حتى لو إديت للمواطن 100 جنيه وهو ما لن يحدث أبدا، حتى لو افترضنا أن الحكومة هتديله 50 جنيها فلن تكفيه كدعم نقدى، لأنه بذلك سيحصل رب الأسرة المكونة من أربعة أفراد على 200 جنيه فقط، وهو لن يكفى للدروس الخصوصية ولا شراء الكسوة ولا إيجار شقة ولا كهرباء وغاز اللى بيزودوا، ولا يودوى العيال للدكتور ولا يشرب بيهم سجاير، يعنى يا دوب عايشين بياكلوا أقل القليل".
جليلة عثمان عضو مجلس النواب ووزير التموين محمد على الشيخ
