نشرت الصفحة الرسمية للشركة القابضة لكهرباء مصر على موقع التواصل الاجتماعي فيس بوك بعض النصائح المهمة لاختيار مكان الأجهزة الكهربائية لتحديد كفاءتها واستهلاكها ضمن حملة "كفاءة يا طاقة" لترشيد الاستهلاك، وفيما يلي بعض النصائح التى تساهم في خفض قيمة فاتورة الاستهلاك:
1- اختار مكان بعيد عن الشمس المباشرة للثلاجات والمجمدات، علشان الماتور ما يشتغلش زيادة.
2- غسالات الأطباق أو الملابس خليها في مكان فيه تهوية كويسة علشان السخونة والرطوبة تخرج بسهولة.
3- التكييف لازم يكون في مكان مظلل وبعيد عن أي مصدر حرارة، وتجنب تركيبه فوق الأجهزة الكبيرة اللي بتطلع سخونة.
4- أجهزة الصوت أو الإلكترونيات الحساسة يفضل تكون بعيد عن النوافذ أو مصادر الغبار.
- وقت التركيب:
1- سيب مسافة ماتقلش عن 10 سم خلف الأجهزة الكبيرة علشان التهوية.
2- في المطابخ، خلي بين البوتجاز والثلاجة على الأقل 60 سم، علشان الحرارة ما تأثرش على التبريد.
3- استخدم قواعد أو أرفف ترفع الأجهزة الحساسة عن الأرض لحمايتها من تسريب المياه أو الرطوبة.
4- لو المكان ضيق، خطط لترتيب الأجهزة بحيث كل واحد يشتغل بكفاءته بدون ما يعطل التاني.
- الاستخدام الذكي:
1- متحركش الأجهزة التقيلة كتير، علشان ما تأثرش على التوصيلات أو المواسير.
2- لو هتشتري جهاز جديد، قيس المكان كويس قبل الشراء (ارتفاع × عرض × عمق) مع مراعاة مساحة التهوية.
3- في الصيف، حاول تحافظ على برودة الغرفة اللي فيها الأجهزة، ده بيقلل استهلاكها.
