بالصور.. مفاجئة غير متوقعة من الفنان مصطفى شعبان لوالدة الشهيد هشام شتا

فاجئ الفنان مصطفى شعبان والدة الشهيد النقيب هشام شتا بمفاجأة غير متوقعة بطلب من الإعلامية إيمان الحصرى والتى كشفت كواليس تلك المفاجأة على صفحتها على "فيس بوك".

وحكت الإعلامية كواليس ما دار قائلة: "الحكاية بدأت برسالة من والد الشهيد النقيب هشام شتا والنقيب هشام شتا للى ميعرفوش واحد من ١٤ ضابط وفرد شرطة استشهدوا فى مذبحة كرداسة الشهيرة فى ١٤ اغسطس ٢٠١٣) بيحيكلى فى الرسالة أن والدة الشهيد هشام بعد ما شافت فيلم اسمه كود ٣٦ بطله الفنان مصطفى شعبان واللى فى شبهه كبير جدا من ابنها الشهيد".

وبالصدفة كمان فى الفيلم ده كان عامل دور ظابط شرطة بدأت تبكى بحرقة وتنادى عليه وتحضن الشاشة وتقول ده هشام !! وهو نفسه يسعدها و يفرح قلبها ولو لدقائق، فلو ممكن أن مصطفى شعبان وأنا نزورها فى البيت لأنها لو شافته هتشوف فيه ابنها وهتبقى سعيدة ودى أمنيه لها بس هو يبعت الرسالة من وراها عشان لو وافق تبقى مفاجأة ولو رفض ما تزعلش.

وتضيف الإعلامية أنها وصلت لمصطفى شعبان اللى كان صعب الوصول إليه عشان بيصور شغل رمضان ومن غير تفكير أو تردد الحقيقة أول ما عرف الحكاية وافق علطول على الزيارة وكان متحمس جدا، وحددنا الميعاد مع والد الشهيد أننا هنروح النهاردة" .

وتستكمل الإعلامية، قائلة: إن الأب قرر يعملها مفاجأة للأم، وفهمها أن زملاء هشام (الله يرحمه) جايين يزوروها وكانت محضرة سفرة كاملة احتفالا بيهم، والحقيقة المشهد اللى فتحت فيه الباب ولقت قدامها مصطفى شعبان والله العظيم مش لاقيه أى كلام يوصفه، بس ممكن كل واحد يتخيل حجم المفاجأة والدهشة والدموع والوجع والفرحة والألم والأمل لأم اعتقدت ولو لدقائق أن ابنها عاد إلى حضنها".