مواطنون لحزب النور: إحنا موافقين على قانون بناء الكنائس..واتقوا ربنا فى البلد ( فيديو)

قامت كاميرا "برلمانى" باستطلاع رأى المواطنين عن رفض حزب "النور" التصويت لقانون بناء وترميم الكنائس، خلال جلسة البرلمان، يوم الثلاثاء الماضى.

جاء رأى المواطنين برفض رأى الحزب السلفى، قال مواطن يدعى جابر: " إحنا كمسلمين مش رافضين بناء الكنائس زى ما إحنا عندنا بيوت ربنا هما عندهم دور عبادة يعبدوه فيها، وإحنا من زمان إيد واحدة رافعين شعار الهلال مع الصليب".

وقال أحد المواطنين يدعى محمد عبد الغفار: "ليه نرفض القانون مش دى شريحة من شرائح المجتمع موجودة وشريحة كبيرة ولها حقوق ولازم يكون لها دور عبادة ..أنا عن نفسى معنديش مانع من وجود قانون ينظم بناء الكنائس ".

أضاف مواطن ملتحى اسمه أحمد محمد: "أنا ذات نفسى مش بسمع للناس دى لا حزب النور ولا الإخوان ولا أى حد خالص لأن كلهم بتوع مصالح ولهم أهداف"، بينما قال مصطفى محمد: "ليه يعنى مايبنوش كنائس عادى وأنا مش مع حزب النور فى قراره والمسيحيين زى إخواتنا ".

قال المواطن جمال عبد الفتاح: " طول عمرنا عايشين مع بعض حزب النور بيعمل ليه كده وعايز أقولهم اتقوا ربنا فى الناس ..الناس مش ناقصة مشكلاتكم، واللى بتعملوه ده يسبب مشكلات فتنة وقلق بين الناس".
قال مواطن يدعى حسن: "أنا من أسيوط وطول عمرنا إحنا والمسيحيين متربيين مع بعض ومفيش فرق بينا وطول عمرنا نزور بعض وعايشين مع بعض ".