رواد الساحل الشمالى "بيستفزونا".. بكرى غاضبًا: الناس تعبانة وعاوزه اللى يطبب عليها

انتقد الإعلامى مصطفى بكرى، عضو مجلس النواب، بعض تصرفات رواد منطقة الساحل الشمالى، التى وصفها بالاستفزازية.

وقال بكرى خلال برنامج "حقائق وأسرار"، على قناة صدى البلد: "فيه ناس بتستفزنا، أنا شوفت فيديو لأخ خليجى بيتكلم عن السيارات اللى موجودة فى العلمين، والله ولا كأننا دولة عندها فائض كبير، بتشترى سيارة بـ 8 مليون ماشى بس بلاش تستفز الناس، نرجوا من إخوانا بتوع دولة الساحل الشمالى يبطلوا يستفزونا"، مضيفا "الشكوى الأساسية للمواطنين هى ارتفاع الأسعار، أين الأجهزة الرقابية، الرئيس مش هيعمل كل حاجة لوحده، دى بلدنا محتاجين نطبطب على الناس، ونمسك أى حد بيزود أسعار على الناس".

وأضاف بكرى "الناس عايزة الستر، محدش عايز يبقى باشا، شوفلنا حل فى أسعار المياه والكهرباء اللى طالعة نازلة"، مردفا "نتمنى أن يحدث استجواب فى مجلس النواب الفترة المقبلة، كما يجب على الإعلام أن يواجه التشكيك".

وواصل "أتمنى أن يكون أول قانون ينظره مجلس النواب فى أكتوبر المقبل، هو اشتراطات البناء، فيه ناس تعبانة وشقيانة ومش لاقية، لازم أحطها فى أولوياتى".