لو سألتك أنت مصرى..
ما تردش السفيرة مشيرة خطاب، المرشحة لمنصب مدير عام اليونسكو، قالت إن مصر موقعها بيتراجع بين الدول، الله ينور، كلام صحيح، وحقائق مخزية، الأزمة إن مشيرة بتحمل الشعب المسؤولية وبتقول: «المصريين لازم يعملوا مجهود كبير عشان يستاهلوا لقب مصرى».
-هز الوسط بالعقل
بمناسبة الثانوية العامة، والتنسيق، أعلنت الراقصة «إيمى»، الحاصلة على بكالوريوس هندسة من جامعة «Rhodec» البريطانية عن استكمال فريقها المعاون، بطبيب، ومحاسب، ومهندس، مصر بتاكل ولادها وحتى الرقص والشغل مع الرقاصات طلع لازم له مجموع، وهز الوسط بالـ C.V. -.
تعالى وأنا أقولك ليه
الدكتور جلال السعيد، وزير النقل والمواصلات، قال إن قرار زيادة أسعار تذاكر المترو فى يد الشعب، وأضاف: «الناس بيسألونا أنتم مرفعتوش سعر التذكرة ليه لحد دلوقتى؟!»، يا ريت الشعب الشقيق يظهر ويعبر عن نفسه، عشان الإخوة فى الحكومة من الواضح إنهم بيخدموا شعب تانى.
