الأحد، 21 أبريل 2024 06:11 م

النائب لـ"حنفى": "أنت كلامنجى وبتضحك ع الناس بـ5 أرغفة.. معندكش غير الكذب.. معايا مستندات تورطك بفساد.. وهتتحاكم جنائيا".. والأخير يرد: "بلاش حقد أنا حر ومش من حق حد يناقشنى"

بكرى لوزير التموين: هى مش عزبة

بكرى لوزير التموين: هى مش عزبة بكرى لوزير التموين: هى مش عزبة
الأحد، 21 أغسطس 2016 11:00 ص
كتب أيمن رمضان
استمرارًا لمسلسل الاشتباك القائم بين الدكتور خالد حنفى وزير التموين، والنائب البرلمانى مصطفى بكرى، فجر "بكرى" مفاجأة مدوية أمس، عندما أعلن عن تقديمه بلاغ للنائب العام بشأن فساد الوزير المالى والإدارى، مشدداً على أنه يمتلك المستندات التى تعزز أقواله وحجم الأموال المتورط فى إهدارها وزير التموين، بالإضافة إلى استغلاله اسم رئيس الجمهورية فى الترويج لقراراته التى تصب فى صالح ما وصفهم بـ"العصابة" التى تسيطر على الوزارة، فى المقابل نفى الوزير كل شىء، مؤكدًا أنه ينفق من ماله الخاص على إقامته فى فندق سميراميس.

مصطفى بكرى

بكرى: الوزارة مش عزبة يا كلامنجى


قال النائب مصطفى بكرى، إن لديه مستندات ضخمة فى قضية فساد القمح، تثبت تورط الدكتور خالد حنفى وزير التموين، فى إهدار المال العام عن عمد بمبالغ تقدر بمئات الملايين، بالإضافة أنه استغل اسم الرئيس عبد الفتاح السيسى، وتابع: "أنا نفسى أشوف الباشا كان شغال إيه قبل ما يبقى وزير، والفيزا بتاعته كان فيها 7 ملايين جنيه إزاى، أنا هوريك كيف يكون الحق والباطل ولو عندك ذرة دم استقيل النهاردة قبل بكرة، انت بتاجر باسم الرئيس وتتآمر عليه، أنت وأمثالك من الذين أفسدوا البلد، عندى كل الأدلة التى تثبت فسادك والقضايا اللى طلبت من النائب العام حفظها، والقرارات اللى أصدرتها و6 مليارات اللى ضيعتهم على الدولة المصرية، هى مش عزبة، الناس غلبانة وطهقانة الناس قرفت وأنت بتضحك عليهم بخمس أرغفه".

مجلس الشعب

بكرى للوزير: موعدنا أمام النائب العام وموظفينك اعترفوا عليك


وأضاف "بكرى" خلال اتصال هاتفى بفضائية "صدى البلد"، أمس السبت، قائلًا: "أنا لا أتحدث من فراغ، الوزير وأمثاله أفسدوا البلد وكان وكيل لآخرين، أنا كنت منتظر أقول الكلام أمام الاستجواب أما إنه استخدم المعركة فأنا بقول له شكرًا على حلو اللسان والتطاول على الناس، وإنما يا سيادة الوزير يا أخ يا كلامنجى موعدنا أمام النائب العام، وعلى فكرة كل الناس اللى فى الوزارة اللى استدعتهم النيابة اعترفوا أنه كان السبب وراء الكثير من القرارات المخلة، والتى أهدرت المال العام".

الجناح

بكرى لوزير التموين: معايا مستندات تورطك بفساد.. وهتتحاكم


وشدد النائب البرلمانى، على أنه سيتقدم ببلاغ للنائب العام ضد فساد وزير التموين الدكتور خالد حنفى، غدًا الأحد، مطالبًا بمحاكمة الوزير جنائيًا، وتابع: "وزير لا يملك إلا الكذب والادعاء على الناس، بتشتم شخص كل اللى عمله إنه طلب إجابة على سؤال، انت هتعلمنى إزاى أبقى نائب، أنا فتحت قضية القمح الفاسد قبل ما أنت تبقى وزير".

وأكد "بكرى"، أن لديه مفاجآت سوف يفجرها تحت قبة البرلمان، مشددًا على أنه يمتلك مستندات تثبت تورط وزير التموين فى قضايا فساد عديدة، وتابع: "هفاجأك بالعصابة التى تولت أمر الوزارة، أنت يجب أن تحاكم محاكمة جنائية مش تستقيل يا سيادة الوزير".

خالد حنفى

وزير التموين لـ"بكرى": أنا حر ومش من حق حد يناقشنى


وأكد الدكتور خالد حنفى، وزير التموين والتجارة الداخلية، أنه يقيم فى أحد الفنادق الشهيرة على نيل القاهرة منذ توليه منصبه، وينفق عليه كثيرًا من ماله الخاص، مشددًا على أنه غير مطالب بتوضيح ذلك لأحد، كونه أمرًا شخصيًّا ولا يخص الرأى العام، مستنكرًا فى الوقت ذاته هجوم النائب البرلمانى مصطفى بكرى عليه، بالقول: "المفروض إنه يبقى العكس، يبقى فيه تعاطف لأن الراجل ده علشان يقدر يؤدّى عمله اضطر يضحى علشان يبقى موجود، وما حاولش يستغل منصبه ويسكن فى مكان يتحايل فيه وياخده من الحكومة، أو يلاقى باب أو آخر من أبواب الحكومة يصرف منها على إقامته، المفروض حاجة زى دى تقابل باحترام وليس بالحقد".

الوزير: مش مطلوب منى أقول بصرف أموالى الخاصة إزاى


وأضاف "حنفى" - خلال اتصال هاتفى مع فضائية "صدى البلد"، أمس السبت - قائلاً: "أنا حر أعمل اللى أنا عايزه فى أموالى الخاصة، ومش مطلوب منى فى أموالى الخاصة أقرر أصرفها إزاى، كل واحد ليه مزاج فى صرفه، فيه واحد بيصرف على العربيات، واحد يقيم فى مكان علشان يقدر يؤدى عمله بشكل كويس، ودى حاجات شخصية جدًّا ومش من حق حد يناقشها على الهواء، مش من حق حد ينقاشنى فيها، لأن دى أمور تخصنى أنا، أنا بدفع فلوس كتير فى الفندق من فلوس أسرتى وأولادى، لأن دى الطريقة الوحيدة اللى تخلينى أقوم بعملى اللى بخدم فيه الناس" .

وشدد وزير التموين فى مداخلته، على أن فكرة إشاعة الحقد بين الناس والتصوير للرأى العام أن هناك فسادًا، أمر فى منتهى الخطورة ولا يبنى الدولة المصرية، مختتمًا حديثه بالقول: "أرجو أن ندرك ذلك ولا نُستدرج لهذا الأمر ".


الأكثر قراءة



print