الرئيس السيسي: "انا مش عاوز من المواطن حاجة انا عاوز اديله وأغنيه"

أكد الرئيس عبد الفتاح السيسي، أن المواطنين يبحثون عن فرص عمل، متابعا: "المواطنين في أسوان مثلا اللى عاوزين فرص عمل.. طب لو جيت وقولت تعالوا ننزل على 50 ألف كبرنامج قومى لمحافظة أسوان.. وننزل عليهم ونقعد كمسئولين على الأرض دى.. نحولهم للزراعة "شتلات".. الـ 50 ألف فدان دول كلهم شتلات.. ده كده التجربة هتسمع والطريقة هتسمع والناس قاعدة على رؤس الغيطان علشان كده.. زيادة الإنتاجية هتكون 50 % ".

وأضاف الرئيس السيسي، خلال كلمته في افتتاح مشروعات جديدة في محافظات الصعيد تعليقا على كلمة وزير الزراعة: "المواطن أنا مش عاوز منه حاجة.. أنا عاوز أديله وأغنيه.. إحنا سوق متواضع لأن اللى بينتج الفدان 40 طن لما يجبله 60-70 طن لا بقى.. وطب وعلى مستوى المساحة كلها".

وأكد على ضرورة اتباع النظم الحديثة في الزراعة، قائلا: "النظام الجديد يزود الإنتاج في الفدان وبالتالي يزود الدخل والإنتاج.. وانت مش دفاع حاجة من جيبك.. فيه فرق بين كلام المكاتب واللى بنعمله على الأرض للناس".

وأضاف الرئيس السيسي تعليقا على كلمة وزير الزراعة: "اقصد أقول مهم الرى بالتنقيط يعمل معاك زيادة ويطلع زراعة كويسة ويقلل سماد وتلوث ويوفر في الأعمال.. وانا محتاج مياه.. لو مليون فدان بالتنقيط هوفر منها مياه وازرع فدانين تانى احنا عاوزين نتكلم مع بعضنا".

وتابع الرئيس السيسي :"أنا مستعد ادفع 100 ألف شتلة.. طالما دفعت بقى بتوعى أنا وأديهم للناس.. لما يكون عندنا 300 ألف فدان ونحولهم من الزرع التقليدي للشتلة وبالتنقيط.. بندفع فلوس ودعم نزود الزراعة ونقلل المياه والسماد.. مش علشان الإنفاق والدعم يكون في محله بس.. علشان نعظم الموارد.. أكبر قدر من الإنتاج بأقل من السماد والمياه".