هل يهدد القيمة المضافة نساء مصر؟.. أسعار مستحضرات التجميل بعد تطبيق القانون

لم تسلم مستحضرات التجميل من ارتفاع الأسعار الجنونى بعد تصاعد سعر الدولار وبدء تطبيق قانون الضريبة على القيمة المضافة، وفى هذا الإطار رصدت كاميرا "برلمانى" أسعار مستحضرات التجميل و"الميك آب" بعد قانون القيمة المضافة.
فى البداية، قال وائل على، صاحب محل لأدوات التجميل بوسط البلد، إن قانون القيمة المضافة هو القشة التى قصمت ظهر البعير، متابعًا: "بعد ارتفاع سعر الدولار،ـ زادت الأسعار بنسبة كبيرة، ليه بقى يتم تطبيق قانون القيمة المضافة فى الوقت الحالى؟ السوق مش مستحمل أصلا أى زيادة".

واضاف "على" - فى تصريح لـ"برلمانى"، اليوم الثلاثاء – قائلاً: "كان يجب على الحكومة عدم تفعيل القانون فى الوقت الحالى، نظرا لارتفاع سعر الدولار الجنونى فى الفترة الماضية، لما الدولار يوصل 12 و 13 جنيه ده صعب جدا، أنا بشتغل فى الميك آب الشعبى من زمان، لأن سعره مناسب للمرأة المصرية، لكن ده كمان سعره زاد فى خلال شهرين للضعف، قلم الروج اللى كان بـ10 بقى بـ 17 جنيه دلوقتى، والماسكرا اللى كانت بـ 20 و 22 جنيه وصل سعرها لـ35 جنيه، الآى شادو فيه منه أنواع كتيرة، وكان فيه منها يجنيهين ونصف الجنيه، بس ده كان زمان، دلوقتى بقى بـ 5 جنيه وبـ 7 ونصف، وفيه منه أنواع صينية وصلت لـ25 جنيه، أما أدوات الميك آب مثل الفرش والإسفنجات وصل سعر الفرشة لـ25 جنيه و30 جنيه من بعد 15 و17، وده طبعا الأنواع الوسط مش الكبيرة، أما سعر الإسفنجة الصغيرة وصلت لـ7 جنيه ونصف، بعد ما كانت بـ3 ونصف".

وأشار وائل على فى حديثه، إلى أن أكثر الأنواع استخداما من أدوات التجميل هى أقلام كحل العين، و"دى كان فيه أنواع شعبية صينى، بتدأ من 7 جنيهات ونصف، وصل سعرها حاليًا لـ12 و15 جنيه، أما بالنسبة لطلاء الأظافر الصينى كان فيه أنواع بتدأ من 3 جنيهات ونصف، أصبح سعره حاليًا بـ7 ونصف، أو 10 جنيهات، وفى الآخر كل ده مستحضرات تجميل صينى مش أصلى، وده أول مرة عيد يعدى علينا ومفيش بيع بالشكل ده، كدا فيه ظلم للشعب وللتجار".