بلاش فضايح يا جونى
النجم العالمى جونى ديب ضرب مراته النجمة آمبر هيرد، علقة موت، ثم بدأت فضائح كل منهما تظهر للعالم كله، واتهم جونى آمبر بأنها صاحبة ميول مثلية، وأنها كانت متجوزة عليه اتنين صاحباتها، ونشر كل منهما للآخر الغسيل غير المغسول، استهدوا بالله يا جماعة، البيوت أسرار، اتطلقوا فى صمت، إحنا مش ناقصين.
حمدلله ع السلامة يا «جندى»
الجنيه الورق يعود إلى الخدمة، بعد 11 سنة إجازة بدون مرتب، وحشتنا يا غالى، أخوك المعدنى بهدلنا معاه، وما سدش فى غيابك، لما تيجى هتتفاجئ، فاكر الدولار يا جندى؟!.. فاكر وقفتك قصاده؟! انسى.. الأخضر حط عليك جامد، حمدلله ع السلامة، وورينا هتعمل إيه.. ربنا معاك.
طظ فى التعليم
ينص الدستور على أن تكون ميزانية التعليم العالى والبحث العلمى 4% من إجمالى الدخل العام يعنى 61 مليار جنيه، ولكن الحقيقة تقول إنه تم تخصيص 35 مليار فقط، يعنى الدولة خصمت 26 مليار جنيه من فلوس التعليم العالى والبحث العلمى عشان تسد بنود أخرى، تحب أقولك الفرق ده راح فين؟ ولا بلاش، طظ فى التعليم وطظ فى البحث العلمى.
