كتب أحمد براء
قال النائب إيهاب السلاب، عضو لجنة الدفاع والأمن القومى بالبرلمان، إنه ليس غريبًا على القوات المسلحة المصرية، أو قوات الشرطة المدنية النظامية أن تتلقى التهانى والشكر بكل مناسبة، خاصةً مع حلول عيد الأضحى المبارك.
وأضاف "السلاب"، فى تصريحاتٍ لـ"برلمانى": "أنا بشد على أيادى رجال الجيش والشرطة، وبقول لهم ربنا معاكم ومهما قلنا من كلمات طيبة لن توفيكم حقكم، ولو كلفتونا إن إحنا نشيل سلاح ونقف جنبكم هننزل علشان أنتوا الدعامة الرئيسية للمصريين، وهيكون ده أقل كتير أوى من حقكم".
وتابع "السلاب": "تعودنا دائمًا من الأفراد والضباط العسكريين، ورجال الشرطة والجيش إنهم حماة الوطن الحقيقيين لهذا البلد، ده مش مجرد كلام رنان بنقوله علشان نشكر بس، دول ولادنا وإخواتنا وأهالينا اللى إحنا عايشين ومتعايشين معاهم بصفة يومية".
وأوضح "السلاب": "أنا عميد شرطة سابق، ولكنى أتحدث الآن بلسان حال المدنيين والعامة، إحنا بنروح كمدنيين نعيّد ونقضى مناسباتنا السعيدة وغير السعيدة، وبنبقى موجودين مع أهالينا فى وسط بيوتنا، وعلى الرغم من ذلك أبطال الجيش والشرطة فى سيناء مابيبقوش موجودين فى عز الأفراح أو الأحزان، ولكن بيبقوا موجودين على الحدود وفى وسط مواقعهم وأماكن خدمتهم الميدانية؛ لتأدية دورهم الوطنى الأساسى لحماية أمن البلد واستقرارها".
كان العميد محمد سمير، المتحدث العسكرى للقوات المسلحة، قد نشر على صفحته الرسمية بموقع التواصل الاجتماعى "فيس بوك"، فيديو لقوات إنفاذ القانون أثناء مواصلتها مداهمة أوكار الإرهاب فى سيناء.
النائب إيهاب السلاب
