ممدوح شاهين: خزينة البلد كانت فاضية والقوات المسلحة اللى بتصرف على المشروعات العملاقة

اعترض النائب محمد عطا سليم، عضو اللجنة التشريعية، على قرار مشروع القانون المقدم من الحكومة بتعديل بعض أحكام القانون رقم 36 لسنة 1975 بإنشاء صندوق الخدمات الصحية والاجتماعية لأعضاء الهيئات القضائية، وبإنشاء صندوق الخدماتت الصحية والاجتماعية لأعضاء القضاء العسكرى، وفرض طابع تمغة بقيمة 10 جنيهات على الأوراق التى تستخرج أمام المحاكم والنيابات والقضاء العسكرى لتمويل هذه الصناديق.

وقال "سليم": إن إنشاء مثل هذه الصناديق أمر مبالغ فيه ونرفض مثل هذه الأمور التى تعد حملا على المواطن المصرى، وكل مواطن رايح يستخرج 30 ورقة بـ30 جنيها هيدعى علينا، وأرفض كلمة تمغة والزيادة مبالغ فيها ومش كل القضاة عيانين، وفيما يتعلق بالقوات المسلحة أعتقد أنها مش محتاجة خالص وميزانيتها مليئة بالأموال.

وعقب اللواء ممدوح شاهين على كلام النائب قائلا: "هل تعلم من أن المشروعات العملاقة والقومية التى تنشأ تتم من خلال القوات المسلحة، متاخدش الموضوع من فوق.. الكلام اللى بتقوله ده طرحه أعضاء مجلس شعب الإخوان فى السابق وقالوا عندهم 70 و100 مليار، وكل المشروعات التى تتم فى البلد من القوات المسلحة وحضراتكم شفتوا الميزانية.. خزينة البلد كانت فاضية فى 2011 وكانت القوات المسلحة هى اللى بتصرف.. وأنا على استعداد للمثول أمام اللجنة أو أى لجان فى المجلس للرد على أى استفسارات مش واضحة".

وواصل النائب عطا سليم حديثه قائلا: "بلاش دى تقدر تقولى كم عدد قضاة القضاء العسكرى وده سؤال عادى"، وهو الأمر الذى انفعل عليه شاهين مرة أخرى:"لا مش عادى بالنسبالى.. مقدرش أقول عددهم كام دلوقتى ومش دا اللى مطروح"، فرد "سليم": " ايه المشكلة مش سر يعنى".


ولم يتوقف عطا الله عن حديثه ولكنه قال:"القصة دلوقتى إنى مش هجاملك عشان إنت فى الجيش"، فثارت عليه القاعة وطالبه النواب بالصمت وقال النائب سامى رمضان: "عيب والله يا عطا الله الكلام ده"، ورد "شاهين": "مش محتاجين مجاملة".