بالفيديو.. مرتضى منصور للألتراس: "معنديش إلا الجزمة.. واللى هيقرب من النادى يتحمل"

حذر المستشار مرتضى منصور، عضو مجلس النواب ورئيس مجلس إدارة نادى الزمالك، كل شباب الألتراس "وايت نايتس" من الاقتراب من بوابة النادى غدًا أو بعد غد، أو بعد سنة، وعلى بعد 3 كيلو مترات من النادى، وأن من يفعل هذا عليه أن يتحمل مسؤولية نفسه.

وقال مرتضى منصور - فى مقطع فيديو نشره عبر صفحته الرسمية على موقع التواصل الاجتماعى "فيس بوك"، اليوم السبت - "إلى كل أب وأم، اوعى تعيطى لو ابنك قرب من بوابة النادى واتقبض عليه أو اتعوّر، اوعى تقرب من بوابة النادى، وإلا انت وأمك وأبوك تتحمّلوا".

وأضاف عضو مجلس النواب عن محافظة الدقهلية، موجهًا حديثة لشباب الألتراس: "لو اتعوّرت أنا مش مسؤول، ولو سجنت ما عنديش إلا الجزمة، كل أمن النادى مسلح، ولن يسمح بالبلطجة أمام نادى الزمالك، وبعدين إيه الشهداء اللى عايز تحتفل بيهم، اوعى تقرب من بوابة النادى، أصغر فرد أمن مسلح، وهنا فيه دفاع شرعى".

وتابع مرتضى منصور: "أنا معنديش وايت نايتس، دى ظاهرة إجرامية انتهت، ولو فكرت إنك تقرب من بوابة النادى، من أى بوابة، هتلاقوا حق الدفاع الشرعى، وإلا هحاسب أى فرد أمن عندى، وأنا حذّرت وكله بالقانون، واللى هيتمسك لو أبوه وأمه باسوا الجزم مش هطلّعهم تانى، وقد أعذر من أنذر".