تحيا مصر.. 7 مرات
شوية تفاؤل، مادمت أنا عايش وبكتب وأنت عايش وبتقرا يبقى لسه فى أمل، عندنا أزمات كتير قوى، أزمة سكر، وأزمة دولار، وأزمة أمن، وأزمة فلوس، وأزمة تعليم، وأزمة صحة، وأزمة أمن، وأزمة مسؤولين، وأزمة تفكير، وأزمة حلول، وأزمة ثقة، بس لسه عندنا الحد الأدنى من كل الحاجات دى، وممكن يتبنى عليه، عندنا مشاكل فى البلد، بس عندنا بلد، إحنا فى المركز الأول على مستوى العالم فى كل حاجة وحشة، وفى المركز الأخير فى كل حاجة كويسة، بس لسه بنصحى ونشتغل وبننام ونحلم، ربنا يعدينا من الحفرة دى على خير، ونقف على رجلينا.
اضحك مع جايزة نوبل
إدارة جايزة نوبل قررت السنة دى تخترع وتدى الجايزة فرع «الآداب» للمغنى والمؤلف الأمريكى، بوب ديلان، وهاجت الدنيا ع الجايزة، وطبعا أدلى المصريون بألشاتهم، وقالوا السنة الجاية هيدوها يا لشعبان عبدالرحيم يا لفيفى عبده فى الأدب، المضحك بقى إن المطرب غريب الأطوار نفّض للجايزة خالص، ولا رد على تليفوناتهم، ولا عبرهم، ولا علق على الموضوع من أساسه، والجايزة اتجرحت فى كرامتها، لدرجة أنها بدأت تشتم وقالت: «إذا لم يتواصل معنا ديلان قريبا، فهذا يعتبر وقاحة»، تفكير غريب جدا، لدرجة إنك تحس إن الاختراعة دى فى الجايزة وراها مخ مصرى، ما هى الحاجات اللى من النوع دى ما بتخرجش غير من عندنا.
